Naalagaaffiup Sinniisoqarfiata oqaluttuassartaa

Naalagaaffiup sinniisua naalagaaffimmi oqartussanut Kalaallit Nunaanni qullersaalluni sinniisuuvoq. Naalagaaffiup Sinniisoqarfia Ministeriuneqarfiup ataani aaqqissuussaanikkut inissisimavoq.

1950 tikillugu Kalaallit Nunaanni qitiusumik allaffissorneq Avannaani Kujataanilu langsfogedinut marlunnut aamma landsrådinut marlunnut avinneqarsimavoq. Nalakkersuinikkut Allaffissornikkullu pissutsinut Kalaallit Nunaannut Ataatsimiititaliarsuup isumaliutissiissutaata kingorna nutaamik aaqqissuussisoqarpoq kalaallit taamaallaat ataatsimik ataatsimoorussamik landsrådeqalerlutik ataatsimillu landshøvdingeqarlerlutik.

Kalaallit ataatsimut landsrådeqqaavata ataatsimiinnera siulleq pivoq septembarip 26-ianni 1951 Nuummi landshøvding P. H. Lundsteen siulittaasoralugu.

Tamatuma kingorna Kalaallit Nunaanni qitiusumik allaffissorneq landshøvdingeqarfiup isumagisarilerpaa. Landshøvdingip suliassai tamarmiusut pillugit inatsisini allaniluunniit allassimasoqanngilaq. Nunap immikkoortuani qullersaanerup landrådimullu siulittaasuunerup saniatigut suliassaqarfinni arlalinni landhøvdingi atuuffeqarpoq, assersuutigalugit landsrådip kommunalbestyresillu ingerlatsiviinut tunngasuni, ineqarnermut inuussutissarsiutinullu tapiisarnermi, sulisoqarnermut akissarsiaqarnermullu tunngasunut aamma suliffeqarfiit assigiinngitsut (napparsimmaviit, atuarfiit, radiofoni il.il.) allaffissuutiginerat.

Namminersornerullutik Oqartussat 1. maj 1979-imi atuutilersinneranni, tak. namminersornerulluni oqartusaaneq pillugu inatsit tunngavigalugu Kalaallit Nunaanni landshøvdingip maannamut suliarisimasai allannguutitalerlugit Naalagaaffiup Sinniisua atuutilersinneqarpoq, tak. namminersornerulluni oqartussaaneq pillugu inatsimmi § 20, imm. 2. Kalaallit Nunaanni Namminersorlutik Oqartussat 21. juni 2009-mi atuutilerneranni Naalagaaffiup Sinniisuata atuuffii allannguuteqanngillat.

Torben Hede Pedersen1. maj 1979- 13. juli 1992
   
Steen Spore1. august 1992- 1. juli 1995
   
Gunnar Martens1. juli 1995- 31. marts 2002
   
Peter Lauritzen1. april 2002- 31. marts 2005
   
Søren Hald Møller1. april 2005- 15. januar 2011
   
Mikaela Engell1. april 2011 

Nittartakkat nalunaarsorneqarfiannik akuersineq

Kisitsisinik katersuinissamut aamma qarasaasiamik atuisut nuannersumik misigisaqarnerulernissaannut qupperneq manna nittartakkat nalunaarsorneqarfiannut atortarpoq.

Nittartakkami ataani taaneqartumi nittartakkat nalunaarsorneqarfiat pillugu paasiniaagit:

Cookie politik